Охрид вечерва триумфираше над Тиквеш во Кавадарци со 20:24 во рамки на меч од 5. коло на плеј-офот на Суперлига.
Охриѓани одиграа одличен натпревар, особено во првиот дел кога домираа на теренот, а голманот на Охрид, Даниел Ѓорѓески имаше 12 одбрани и одлично ја „спушташе ролетната“, за што Тиквеш немаше решение.
Веднаш после натпреварот изјава за Спортска Мрежа даде Ѓорѓески, кој вели дека одиграле одличен натпревар, со доста добра одбрана и мотивација што било клучот за победата во Кавадарци.
„Пред сè, сакам да им честитам на моите соиграчи за борбеноста, за одличната игра денес, како и за оваа многу важна победа за нас.. одигравме еден одличен натпревар, посебно во првото полувреме нашата одбрана беше на ниво на задачата, па со тоа доста ми помогнаа и мене. На крајот мислам дека тоа и пресуди- добрата одбрана и големата мотивација кај сите играчи. Многу ја посакувавме оваа победа, на крајот и успеавме и се надевам дека ќе продолжиме во ист ритам до крајот на сезоната“, изјави голманот на Охрид, Даниел Ѓорѓески за Спортска Мрежа.
Охрид се зацврстува на четвртото место на табелата со пет бодови, а пак Тиквеш останува на петтото место со три бодови. Во следното коло Охрид дома ќе игра против Бутел, тим кој нема бодови, а пак Тиквеш оди во Битола кај шампионот Еурофарм Пелистер.
