Второлигашот Борец од Велес лошо ја започна новата сезона откако нанижа три порази во низа, вчера загуби и во Купот на Македонија, а ваквите слаби резултати беа причина за тренерска промена.
Љупчо Димитковски – Гањо е минато во Борец, а нов кормилар на велешкиот второлигаш е Даниел Стојановски, кој минатата сезона го предводеше третолигашот Куманово, меѓутоа овој тим не го помина баражот и остана во Трета лига – Север, откако во баражот загуби од второлигашот Победа со 2:1.
Борец статистички е најлош во Втората лига. Велешани имаат три порази во Втората лига, со примени седум погодоци, од кои едниот е автогол, а притоа е единствен тим без постигнат гол.
Борец уште во првата фаза од Купот беше исфрлен од Детонит со 0:1, а притоа и тука не постигна гол.
Во новата сезона целта на повратникот во Втората лига е да се обезбеди опстанокот, 38-годишниот стратег своето деби на клупата на Борец ќе го има во недела на мечот со Вардарски од Богданци во дуел за први бодови на Борец, а прва победа на Вардарски.
