Овој викенд, на 6 април, Велес ќе пречека повеќе од 200 кајакари од цела Европа, кои ќе се натпреваруваат во второто коло од Европскиот куп во кајак – дисциплина спуст. Ова престижно спортско случување го зацврстува статусот на Велес како центар за водени спортови во регионот.
Настанот продолжува да ја гради традицијата на големите натпреварувања, по успешните Балкански првенства и Светски купови организирани во последните две години. Натпреварувачи од Словенија, Хрватска, Босна и Херцеговина, Србија, Косово, Албанија, Грција, Турција, Бугарија и Македонија ќе се борат за бодови на европската ранг-листа.
Спортистите ќе се натпреваруваат во шест дисциплини, поделени во две категории – јуниори и сениори. Натпреварувањата започнуваат во недела од 9:30 часот со првата квалификациска трка, по што ќе следи второто возење во 11:30 часот. Најдобрите 15 во секоја категорија ќе се пласираат во финалната трка, која е закажана за 14:30 часот, кога ќе се одлучат победниците.
Велес овој викенд ќе биде центар на европскиот кајак, а љубителите на спортот ќе имаат можност да проследат врвни возбудувања на дивите води на реката Вардар.
Виолета Јанчева, Спортска Мрежа
