Ракометниот клуб Охрид продолжува со формирање на тимот за следната сезоната од Суперлигата, каде „гладијаторите“ ќе влезат со повисоки цели и амбиции. Новиот стратег Борис Ројевиќ кој ќе го води Охрид од следната сезона ги добива првите засилувања.
Откако беше промовиран српскиот интернационалец Преград Вејин, „гладијаторите“ го претставија и словенечкиот интернационалец Тилен Стрмлјан.
Тој во Охрид доаѓа од германски Хановер, како слободен агент, неговиот договор истекнува на крајот од сезоната, а дресот на Охрид ќе го носи во следните две години.
Средниот бек има 29 години, освен добрите настапи во ЕХФ Европската лига со екипата на Хановер, имаше и одлични настапи во Лигата на шампионите со екипата на Цеље. Пред тоа настапуваше и за екипата на Рико Рибница од Словенија. Има преку 30 настапи за репрезентацијата на Словенија во младинските и сениорските натпреварувања.
