Во рамки на 12. коло екипата на Слога Виница го доби дербито со Брегалница од Делчево со резултат од 2:0. Противникот „скапо си ја продаде кожата“ во Виница, Брегалница беше борбена и сакаше да направи изненадување против фаворитот, но сепак трите бодови останаа во Виница.
Нови засилувања на Слога Виница беа тие кои ја обезбедија победата, откако Филип Петковски во 42. минута погоди за 1:0 на полувреме, а во вториот дел Дарко Стојанов постигна гол за конечните 2:0.
Слога Виница со овој триумф има 13 бодови залиха во однос на второто место и со тоа веќе ја обезбедува шампионската титула и баражот за Втора лига.
Ударник преку пресврт одново загуби овој пат на домашен терен од Малеш со резултат од 1:2. Само десет минути игра беше потребно за Александар Тенекеџиев да постигна гол за 1:0. Но, радоста на домашниот тим не траеше долго, откако Виктор Андреевски постигна гол во 29. минута за 1:1.
Во второто полувреме Илија Бојчовски постигна погодок за пресврт од 1:2, а воедно резултат од 58. минута стана и конечен за победа на Малеш.
Трите бодови останаа во Зрновци откако Светлост со 3:2 славеше триумф над Тиверија која продолжува да нижи порази и со тоа останува на дното од табелата во Трета лига – Исток.
Гостинот од Струмица преку Христијан Тимов во 7. минута дојде до предност од 0:1, но по две минути Стефан Стефановски израмни на 1:1, а до крајот на првиот дел Драган Гаврилов погоди за 2:1 на полувреме.
Во второто полувреме Илија Шуманов беше прецизен за водство на Светлост од 3:1, а во 80. минута Тимов со втор гол ги постави конечните 3:2.
Карбинци забележа голема победа над Хоризонт Турново на гостински терен од 0:4 во меч каде домаќинот од 83. минута играше со играч помалку на теренот, откако Христијан Јакимов заработи втор жолт картон и беше исклучен од игра.
Гостинот преку Никола Илиевски по само пет минути го отвори резултатот за водство од 0:1, а во 43. минута Саше Соколов од пенал погоди за 0:2 на полувреме. Во финишот на мечот Карбинци ја искористи предноста со играч повеќе на теренот и во 85. минута преку Христијан Крстов дојде до 0:3, а пак во 90. минута преку Тоше Спиридонов дојде до конечните 0:4.
Дојранско Езеро забележа минимална победа од 1:0 над Овче Поле на домашен терен со голот на Митко Цонев постигнат во 15. минута од натпреварот.
Слога Виница е водечка со 33 бодови на своето конто 13 бодови повеќе од Овче Поле кој е втор и Брегалница која е трета со по 20 бодови. На дното останува Тиверија со шест бодови и Ударник кој е претпоследен со седум бодови.
Во следните денови ќе имаме комплетна анализа на Трета лига – Исток со преглед на табелата на Спортска Мрежа.
