Со јасна цел и визија, со свежи идеи и мисли се формираше новиот женски ракометен клуб Атлетик, кој од следната сезона ќе се натпреварува во домашниот шампионат.
Се работи за исклучително амбициозен и сериозен проект, клуб кој ќе биде вистински освежување во женскиот ракомет и ќе има значајна улога во развојот на женскиот ракомет.
Некогашните вардарки повторно заедно, со нивното стекнато искуство во европскиот женски ракомет преку ЕХФ Лигата на шампиони ќе овозможи да се остварат зацртаните цели.
Претседател на клубот е Горан Стојков, за потпретседател е назначен Дејан Блажески. Извршен директор на клубот е Ана Стојков, спортски директор е Инна Суслина, оперативен менаџер е Михаела Митреска.
„Со големо задоволство ви го најавуваме проектот кој го смисливме со многу голема љубов и желба, проект за кој веруваме дека ќе биде нешто посебно во женскиот ракомет, клуб на кој сите ќе бидеме горди. Стекнатото искуството во европскиот женски ракомет преку најелитното натпреварување во Европа, ЕХФ Лигата на шампиони во годините наназад заедно со нашиот стручен тим на клубот ќе ни овозможи полесно да ги оствариме зацртаните цели со исклучиво наши македонски играчи. Целта е јасна, преку сите овозможени услови за работа да се создадат врвни ракометарки со кои достоинствено ќе ја претставуваме Македонија на европската сцена“, рече Ана Стојков.
Главен тренер на екипата ќе биде Татјана Хмирова, асистент тренер Ивана Велковска, тренер на голмани Тања Андрејева, кондиционен тренер ќе биде Дејан Пецаковски, фитнес тренер Марија Дурљанова, физиотерапевт Нина Димковска, а пак спортски психолог Кирил Насков.
„Пресреќна сум што сум дел од овој прекрасен нов проект ЖРК Атлетик, клуб со позитивна и перспективна иднина и прекрасни луѓе. Мислам дека имаме одличен тренерски колектив со свежи идеи и мисли, подготвен да даде 200% од себе. Нè очекува многу работа, со нетрпение го очекувам почетокот на сезоната“, вели Хмирова.
Се очекува во следниот период да пристигнат звучни имиња во ЖРК Атлетик.
„Ги повикуваме сите активни ракометарки кои се заинтересирани да бидат дел од ЖРК Атлетик, да се пријават најдоцна до 31.05.2025 година. Женскиот Ракометен Клуб Атлетик е формиран 2025 година и има за цел да игра водечка улога во развојот на младите талентирани ракометарки во Македонија. Преку соодветни и правилни тренинзи, модерни методи и однапред дефинирана програма на функционирање, клубот се стреми да биде расадник на голем број идни репрезентативки на нашата држава. Со вклучување на млади и амбициозни поранешни репрезентативци а сегашни ракометни работници, ќе создадеме здрава средина на вистински спортски вредности, без фаворизација, со еднаква можност за докажување на теренот и надвор од него. ЖРК АТЛЕТИК во натпреварувачката сезона 2025/2026 ќе настапува во сите категории: Пионерска, кадетска, младинска и Супер Лига. Исто така, клубот ќе има сопствена школа за девојчиња почетници“, велат од клубот.
Тренинзите и натпреварите на ЖРК Атлетик ќе се одвиваат во СЦ Јане Сандански, а седиштето на клубот е во општина Аеродром.
