Женската ракометна репрезентација на Македонија ги доби противниците во квалификациите за Европското првенство 2026, кое за првпат во историјата ќе се одржи во пет различни држави: Романија, Полска, Чешка, Словачка и Турција.
Ждрепката во Клуж ја смести Македонија во групата три, каде ќе се соочи со силните селекции на Германија, Словенија и Белгија. Пласман на ЕП ќе обезбедат првите две репрезентации од секоја група, како и четирите најдобри третопласирани селекции.
Домаќините на шампионатот – Романија, Полска, Чешка, Словачка и Турција – веќе имаат загарантирано место, исто како и трите најдобри селекции од ЕП 2024: Европскиот шампион Норвешка, вицешампионот Данска и третопласираната Унгарија. Овие репрезентации нема да играат квалификации, туку ќе бидат дел од ЕП.
Квалификациските натпревари ќе се одиграат во три прозори: од 15 до 19 октомври 2025, од 4 до 8 март 2026 и од 8 до 12 април 2026 година.
Македонските ракометарки, кои настапија на последните две Европски првенства во 2022 и 2024 година, ќе имаат шанса повторно да се најдат на континенталниот собир. ЕП 2026 ќе се одржи од 3 до 20 декември.
