Денес се комплетираше 20. коло од Првата македонска фудбалска лига, а во рамки на денешните натпревари Работнички забележа минимална победа од 1:0 над Воска Спорт со голот на Анес Рушевиќ, кој стрелаше во 56. минута.
Шкендија забележа голема победа над Силекс од 4:2 во Тетово и направи голем чекор кон титулата со тоа што тетовци се осамени на врвот со три бода повеќе во однос на Работнички кој сега се проби до второто место.
Ади Алиќ по пет минути игра дојде до водство од 0:1, а потоа Ване Крстевски постигна гол за 1:1 веќе во 10. минута. Во вториот дел двете екипи тргнаа со цел да напаѓат за втор гол, но овој пат прва погоди Шкендија за 2:1 и пресврт преку Флорент Рамадани.
Во 77. минута искусниот и најдобар стрелец Бесарт Ибраими стрелаше за 3:1, а во 82. минута Бојан Рајков постигна гол и ја врати неизвесноста при 3:2. Сепак во 86. минута Лиридон Латифи постигна погодок за 4:2 и решавање на сите дилеми за денешниот победник во Тетово.
Брера Струмица загуби на домашен терен од Шкупи со 1:2, откако Аворнуо постигна гол за 0:1 на полувреме. Во вториот дел Имери постигна гол за двојна предност од 0:2, а во 82. минута Ѓоргиевски постигна гол за конечни 1:2.
Соочувањето меѓу Беса и Гостивар заврши без победник, но и без погодоци (0:0) за поделба на бодовите.
Пелистер го освои Кавадарци откако преку пресврт со 1:2 славеше над Тиквеш во „братското дерби“ со што трите бодови заминаа во Битола.
По 0:0 во првиот дел во второто полувреме Даниел Миловановиќ постигна гол за 1:0 и водство на Тиквеш во 64. минута. Сепак, за кавадаречкиот тим следуваше шок во финишот, откако Јорданчо Наумоски во 85. минута погоди за 1:1, а веќе во 88. минута Александар Ристевски погоди за конечни 1:2.
Вчера, Вардар преку Закариќ и Мато со 0:2 славеше над шампионот Струга Трим Лум.
