Второлигашот Победа од Прилеп за продолжението од сезоната се засили со Давид Јошески, кој во Прилеп доаѓа од редовите на битолски Пелистер.
21-годишниот фудбалер од среден ред треба да биде освежување за Победа, која во новата сезона атакува на директен опстанок, со цел да не се повтори ланската сезона, кога некогашниот прволигаш во баражот го избори опстанокот совладувајќи го шампионот на Трета лига – Север, Куманово.
Јошески е повратник во редовите на Победа за која настапуваше од 2015 до 2022 година, кога прилепчанецот замина во струшки Караорман, од таму во Пелистер, а сега одново во Победа.
По три одиграни кола во Втората лига Победа има два порази и еден триумф и на своето конто има три бодови. На 25. септември Победа на домашен терен ќе игра со Арсими.
