Третолигашот Академија Илинден за новата сезона во Третата фудбалска лига – Север, која започнува на 15. септември промовираше неколку нови засилувања.
Како што претходно информиравме за Енсар Сулемани и Горан Симоновски, во Академија Илинден нови засилувања се Ментор Реџепи, искусен фудбалер кој во својата кариера има настапувано за екипи од Првата и Втората македонска фудбалска лига, односно за екипите на Тетекс, Осогово, Братство од Житоше, Велазерими и Ренова.
Ново име е и Хасан Арифи кој доаѓа од Шафхаусен од Швајцарија, Матеј Веселинов кој настапуваше за Рад од Белград, Кристијан Трајановски од екипата на Спорт Ефе Вардар, Никола Уневски од Вардар. Нови имиња во третолигашот Академија Илинден се и Шефки Бериша и Хамза Мурати од Башкими Љуботен, Дамјан Младеновски кој доаѓа од Скопје, Игор Скепаровски кој доаѓа од третолигашот Преспа од Ресен, Леонид Дамевски од Бутел, Шехи Бесим од Косово и Кристијан Антевски од Македонија ЃП.
Од екипата на Академија Илинден си замина Давид Голубов кој ја продолжи кариерата во второлигашот Охрид, како и Дамјан Ангеловски кој е нов играч на второлигашот Победа од Прилеп.
Во минатото овој клуб настапуваше и во Втората македонска фудбалска лига, под името Пехчево Скопје, но испадна во Трета лига – Север.
Тренер на Академија Илинден ќе биде Сашо Рајатовски, а новата сезона екипата ја отвара со локалното дерби против Кадино, натпревар кој ќе се игра на стадионот на Фортуна во скопската населба Ченто.
Инаку, домашните натпревари екипата на Академија Илинден ќе ги игра на стадионот во Кадино.
Александар Ванев, Спортска Мрежа
