Санација на теренот со вештачка трева „Филип Лазаревски“ во Струмица, со цел подобри услови за вториот дел од сезоната. Како што информира фудбалскиот клуб Тиверија, кој е сопственик на овој терен, извршена е санација на оградата, односно оштетените делови се заменети со нови, направено е чистење на теренот, кабините за резервни играчи и трибинскиот простор.
Грижата на спортските терени е голема и важна обврска на клубовите, но пред се и на навивачите и гледачите, кои за време на гледањето на натпреварите треба да водат грижа за спортската инфраструктура, истата да не се оштетува, да не се загадува.
„Фудбалскиот клуб Тиверија имаше работни активности на теренот со вештачка трева -„Филип Лазаревски“ , терен кој е во сопственост на нашиот клуб. Во текот на вчерашниот ден отстранети се оштетените делови од оградата зад двете стативи, и исчистено е во оградениот дел околу теренот, кабините за резервни фудбалери и трибинскиот простор. Активностите во и околу теренот ќе продолжат и наредниот период, а веќе се договорени и заеднички поголеми зафати во соработка со ФК Беласица, како и еколошки акции со девојките од ЖФК Тиверија Брера АД. Упатуваме апел до клубовите, фудбалерите и граѓаните да се грижат за хигиената во и околу игралиштето“, се вели во соопштението на ФК Тиверија.
Овој терен го користат третолигашот Тиверија кој настапува во Трета лига – Исток како и прволигашот Тиверија Брера кој се натпреварува во Првата женска фудбалска лига, но и Беласица која некогаш тука тренира или одигрува пријателски натпревари.
Со овој потек се подобруваат условите за игра за вториот дел од сезоната, а Струмица може да се пофали со богата спортска фудбалска инфраструктура.
