Есенскиот шампион во Првата женска фудбалска лига, Тиверија Брера, денес во Струмица одигра пријателски меч против бугарскиот тим Спортика, кој е на второто место во бугарскиот шампион и се бори за титула. Пријателскиот меч во Струмица заврши со триумф за Тиверија Брера преку пресврт за конечни 5:1.
Бугарскиот тим прв дојде до водство во Струмица, а потоа струмичанки израмнија на 1:1 на полувреме. Во вториот дел Тиверија Брера со четири нови погодоци ги постави конечните 5:1.
Меч каде струмичкиот прволигаш доминираше на теренот, особено после тој погодок за 1:1 и во вториот дел Тиверија Брера со одлична „тика-така“ едноставно везеше на теренот, а мрежата на бугарскиот тим пет пати се тресеше.
Тиверија Брера до оваа победа дојде на бразилски погок откако Бразилката Тчеури Харуми Гоја постигна хет-трик и ги собра симпатиите на публиката, а по еден погодок постигнаа новото засилување интернационалката од Кенија, 33-годишната Кристин Нафула, како и Билјана Панеска.
Денешниот меѓународен натпревар беше деби во сениорска конкуренција за Леонтина Пржолева и Босилка Василева, кој со штотуку наполнети 15 години се здобија со права на настап во сениорска конкуренција и денес дебитираа против Спортика.
Тиверија Брера е лидер на табелата во Првата лига со 37 бодови или четири повеќе во однос на Каменица Саса која е втора и шест повеќе во однос на актуелниот шампион Љуботен од Тетово кој е трет.
Пролетниот дел екипата на Тиверија Брера го отвара против СЦ Истатов во скопско Пржино односно на гостински терен.
