Македонската фудбалска репрезентација на стартот од новото издание на Лигата на нации разочара откако одигра само 1:1 против Фарски Острови во гости, а веќе утре има шанса да се поправи против Ерменија, во меч каде само победа е опција, се друго ќе биде нов неуспех.
Македонија денес го одработи тренингот пред утрешниот меч со Ерменија, кој се игра на Националната арена во Скопје, а селекторот Благоја Милевски вели дека нема разочарување по оние 1:1 со Фарски Острови.
“Ментално ништо не е променето, познавајќи ги моите фудбалери, тие се максимално подготвени за секој нареден предизвик. Нема разочарување по одиграните 1:1 со Фарски Острови. Без никакво потценување на селекциите како Летонија и Фарски Острови, сметам дека дуелите со Ерменија ќе бидат клучните за нас во борбата за првото место во групата. Не остваривме победа во воведното коло од новото издание на Лигата на нации, но нема предавање. Мечот со Фарски Острови е зад нас, со мислите сме комплетно насочени кон дуелот со Ерменија. Нашата улога секогаш е важна, без оглед на против која селекција играме. Од нас самите зависи како ќе одиграме утре и дали ќе оствариме позитивен резултат” рече Милевски.
Голманот Столе Димитриевски вели дека победата е единственото нешто што го посакуваат на утрешниот меч.
“Како заменик капитен на Македонија, максимално сум фокусиран и мотивиран за да го одработам мечот со Ерменија. За нас најважно е да се победи утре, за да си ги зголемиме можностите за првото место во групата. Во овој момент најважен е утрешниот натпревар против селекцијата на Ерменија. Се надевам дека утре ќе се покажеме во добро светло, ќе одиграме добар натпревар и ќе забележиме победа. Победата е единственото нешто што го посакуваме на утрешниот меч. Анализиравме многу и подготвени сме за утрешниот натпревар”, рече Димитриевски.
Мечот се игра во 20:45 часот.
Алексадар Ванев, Спортска Мрежа
