Ракометарите на Тинекс Пролет ги започнаа подготовките за вториот дел од сезоната во Суперлигата.
Тренерот Александар Јовиќ на располагање ќе ги има речиси сите ракометари од првиот дел од сезоната, а клубот ќе биде на македонски погон односно со македонските ракометари и нивниот развој ќе биде приоритет и во наредниот период.
„Предвидено е во наредниот период екипата да тренира во Скопје, по што ќе бидат одиграни и неколку пријателски натпревари. Единствениот кој си замина од редовите на нашиот тим зимава е тунискиот интернационалец Мохамед Рарик Бахар. Десниот бек го мина првиот дел од сезонава како позајмен играч од Вардар, но поради семејни причини реши да се врати назад во татковината. Му благодариме на Бахар за придонесот во првиот дел од сезоната и му посакуваме многу среќа во идните ангажмани“, велат од клубот.
Пролет првиот дел од сезоната го заврши на 7. место на табелата со 14 бодови и има два бода помалку од плеј-оф зоната, па во пролетниот дел целта ќе биде обезбедување на место за плеј-оф.
