Женскиот фудбалски клуб СЦ Истатов меѓу првите ги започнува подготовките за пролетниот дел од Првата лига. Клубот предводен од искусниот стратег и поранешен селектор Кирил Изов имаше успешна есенска полусезона со пласманот во првите пет екипи и влезот во осумте во Купот на Македонија. За пролетниот дел ЖФК СЦ Истатов ќе има сериозни амбиции и токму од тие причини клубот порано ќе ги започне зимските подготовки.
Шефот на стручниот штаб Кирил Изов за среда, 15. јануари го закажа стартот на подготовките кои ќе се одвиваат во Скопје и во Дојран во СЦ Истатов.
„Самиот пласман на табелата и борбата за Куп трофејот налагаат што подобро да се подготвиме во овој зимски период за да продолжиме со добрите игри и резултати од есенскиот дел. Подготовките ќе се одвиваат во Скопје, а екипата 10 дена ќе престојува во Спортскиот центар Истатов во Дојран каде имаме одлични услови за работа и се надевам дека до почетокот на првенството ќе ја постигнеме оптималната форма. Закажани се пријателски натпревари со шампионот Љуботен на 1. февруари, на 15. февруари играме со соседот ЖФК Скопје, на 22. февруари ќе гостуваме во Речица, додека викендот 08/09. февруари е резервиран за гостување во Србија и двомеч со Машинац во Ниш. Планираме да го засилиме дополнително и тимот, веќе ни пристапи Андреа Коловска од ЖФК Љуботен, во преговори сме со уште неколку млади фудбалерки, но според мене најголеми засилувања за тимот ќе биде враќањето од повреди на стоперот Катерина Петкова и најдобриот стрелец Кристина Петрушевска кои се фит и од 15. јануари ќе се приклучат на тимот и на подготовките“, изјави стратегот Кирил Изов за Спортска Мрежа.
Тимот на СЦ Истатов пролетниот дел го отвара на домашен терен против лидерот Тиверија Брера од Струмица.
