Третолигашот Слога Виница, кој е есенски шампион во Трета лига – Исток го утврди планот на подготовки за пролетниот дел од сезоната.
На 15. јануари стратегот Емил Грнев ќе означи старт на подготовките, а целта на тимот е потврда на првото место во Трета лига – Исток и обезбедување на баражот преку клубот може да се промовира во Втората лига.
Според информациите на Спортска Мрежа првата фаза од подготовките ќе се одработи во Виница, а потоа тимот заминува на подготовки во Дојран, каде ќе се одработи главната фаза во период од 27. јануари до 3. февруари.
Договорени се и пријателските натпревари преку кои ќе се бруси формата за пролетниот дел. Првиот пријателски меч ќе биде одигран на 25. јануари против второлигашот Каменица Саса во Виница, потоа на 29. јануари тест-меч со второлигашот Кожуф во Дојран, а во Дојран екипата на Слога Виница ќе се тестира и со второлигашот Вардар од Неготино.
За 8. февруари е закажан тест со второлигашот Осогово, кој ќе се одигра во Виница, додека пак на 15. февруари Слога Виница ќе се тестира со есенскиот шампион во Трета лига Запад, екипата на Тетекс, која лани испадна од Втора лига, овој меч ќе се одигра во Тетово.
Како што веќе информираше Спортска Мрежа, Слога Виница досега се засили со Иван Настевски, Тони Мирчевски и Дарко Стојанов од Детонит Плачковица, со младиот Филип Николовски од Каменица Саса, Љупче Христовски од Беласица и со голманот Антонио Столевски од Победа.
Според нашите информации не е исклучена можноста за уште неколку квалитетни засилувања за пристигна во Слога Виница, која има седум бодови повеќе во однос на второпласираниот Овче Поле до Свети Николе на третолигашката табела во Источниот регион.
