Ракометарите на Бутел Скопје ги започнаа подготовките за пролетниот дел од сезоната со цел потврда на местото во плеј-офот. Тренерот Горан Кузманоски има на располагање 20 играчи, откако тимот го напуштија Цветковски, Бошковски и Јовевски.
Како дел од подготовките, Бутел ќе има пет пријателски натпревари пред почетокот на последните шест кола од регуларниот дел на сезоната. Тимот ќе се тестира и преку учеството на меморијалниот турнир „Горан Ченгиќ“ во Сараево, БиХ, кој ќе се одржи од 17 до 19 јануари. Во групата А, Бутел Скопје ќе се соочи со словенечкиот Марибор, домаќинот Босна и црногорскиот Рудар Плевља, а ќе одигра и уште еден меч за пласман.
По враќањето во Скопје, ракометарите ќе одиграат дополнителен пријателски натпревар против екипата на Врање на 31 јануари. Официјалниот старт на пролетниот дел од Суперлигата е закажан за 8 февруари, кога Бутел Скопје ќе гостува во Прилеп.
