Второлигашот Детонит Плачковица денес во 12 часот го има првиот собир во новата година, тренерот Горан Здравков ќе го одржи првиот собир во 2025 година со играчите со што ќе се означи старт на подготовките, а првиот тренинг ќе започне во 13 часот на Градскиот стадион во Радовиш.
Радовишани ќе имаат промени во играчкиот кадар, од клубот заминаа капитенот Иван Настевски, Тони Мирчевски, Дарко Стојанов, Стефан Бабунски и Анџело Николовски, но пристигнаа повратниците Филип Димоски, Јовица Радевски, како и Давид Јошески, Дамјан Масевски и Филип Манасиевски, за што Спортска Мрежа веќе информираше.
Првиот тест меч ќе се одигра на 18. јануари против Кожуф, потоа на 22. јануари со прволигашот Брера Струмица, три дена подоцна следува тестирање со Беласица, а пак на 29. јануари против Осогово од Кочани.
За 2. февруари е закажан меѓународен пријателски меч со Вихрен Сандански кој ќе се одигра во Бугарија, а “генералката” на тимот на Здравков ќе биде против прволигашот Силекс, меч кој ќе се одигра во Кратово.
