Ништо од дербито во Штип, Црна Река како „експрес воз“ помина и го „прегази“ Мал Ајакс, откако тимот од Кавадарци со 1:4 беше убедлив против штипјани, а мечот од 3. коло на Втората футсал лига го одбележа дебито на Даниел Миловановиќ.
Гостинот уште во првите дваесет минути си ја заврши работата и во второто полувреме се „одмараше“ за патот кон дома. Миловановиќ имаше одлично деби со два гола, откако најпрво погоди во 7. минута за отварање на резултатот, а во 12. минута стрелаше за двојна предност.
Мал Ајакс немаше време ниту да здивне, прими трет гол, Никола Димов погоди во 13. минута за 0:3, а во самиот финиш од првиот дел Стојан Петковски „тресна“ гол за 0:4 на полувреме.
Во второто полувреме Александар Михајлов си постигна автогол, па им го ублажи поразот на штипјани.
Црна Река стигна до втората сезонска победа во вториот меч за нив, откако во првото коло беа слободни. За Мал Ајакс по двете победи, ова беше прв пораз.
Спортска Мрежа како и што најави пред почетокот на натпреварот, Црна Река беше повеќе од јасен фаворит, а Мал Ајакс кој на „тенок мраз“ ги доби Овче Поле и Кратово беше пред сериозен испит вечерва и се соочи со висок пораз.
