Ракометарите на Бутел Скопје ја завршија европската авантура во второто коло од ЕХФ Европскиот Куп, иако на реваншот во „Расадник“ славеа против Горица со 25-24. По поразот од 27-24 на гостувањето во Хрватска, на македонскиот состав му недостигаше само еден погодок за да ја анулира негативата, но последниот чекор кон посакуваниот пресврт остана недостижен.
Гостите подобро го отворија натпреварот, но Бутел брзо ја презеде иницијативата и поведе со 5-3, а подоцна имаше предност и од два гола. Сепак, периодот со грешки во нападот им овозможи на Хрватите да направат пресврт и да стигнат до водство од 14-12. Субашевски погоди во последната секунда од првото полувреме за 14-13 и ја задржа надежта на домаќините.
Во продолжението, Бутел постепено ја презеде контролата. Одбраната предводена од Чаневски беше сè посигурна, а Субашевски со серија погодоци му помогна на својот тим да се врати во игра. По израмнувањето на 18-18, домашните продолжија да притискаат, па со головите на Михајловиќ и Стаменковиќ поведоа со 22-20.
Во завршницата скопјани стигнаа и до предност од 24-21, а потоа и до 25-22, резултат со кој беа на само еден гол од целосен пресврт во двомечот. Бутел ја имаше и клучната можност да ја зголеми разликата, но не ја искористи. Горица возврати преку Караула, кој со погодоците од пенал и во самиот финиш ја намали разликата на 25-24 и ги урна надежите на домашните за продолжување во третото коло.
Субашевски беше најрасположен во редовите на Бутел, додека Стаменковиќ постигна четири гола. Кај гостите, Караула се истакна со осум погодоци.
Иако европскиот пат заврши, Бутел покажа дека може рамноправно да се носи со противникот и беше на само еден чекор од голем пресврт. Ова искуство ќе биде значајно за младиот состав на Стојанче Стоилов во продолжението на сезоната.
