Струмица 2001 подготвена го дочекува стартот на новата сезона во Суперлигата. Тимот зад себе има 35 дена тренажен процес, во кој фокусот бил ставен на физичката и тактичката подготовка, а одиграни се и четири контролни натпревари.
Шефот на стручниот штаб Златко Зетов е задоволен од сработеното и верува дека неговиот тим е подготвен за првите предизвици.
„Екипата е во тренинг веќе 35 дена и мислам дека овој период максимално го искористивме за да се подготвиме како физички, така и тактички. Одигравме четири контролни натпревари и сметам дека сме максимално подготвени за почетокот на Суперлигата“, вели Зетов.
Според него, МЗТ Скопје и Работнички се издвојуваат според составите, додека останатите екипи се со прилично изедначен квалитет, па малите детали би можеле да одлучуваат за пласманот.
„Гледајќи ги ростерите на сите екипи, сметам дека оваа сезона предначат екипите на МЗТ Скопје и Работнички, а сите други екипи по квалитет се изедначени и нијанси ќе одлучуваат кој кое место ќе го заземе на табелата. Што се однесува до нашиот тим, нашата првична цел е опстанок во Суперлигата, но доколку ни се пружи шанса сигурно ќе ја искористиме за да се вмешаме во борба за некое место погоре“, истакнува тренерот на Струмица 2001.
Струмичани сезоната ќе ја започнат на домашен терен против Работнички, што ќе биде сериозен предизвик за тимот уште на стартот.
„Секако дека победата во премиерното коло е важна. Ние првиот натпревар го играме на домашен терен со екипата на Работнички кој, како што реков, е фаворит за највисок пласман. Како екипа, до јавноста и нашите навивачи може да испратиме порака дека, покрај квалитетот кој што го поседуваме, на секој натпревар ќе видат борба, енергија и желба за победа без разлика на противникот“, порача Зетов.
