Македонските судии повторно ќе бидат дел од најквалитетното европско клупско натпреварување. Димитар Митревски и Благојче Тодоровски добија ново делегирање од Европската ракометна федерација за натпревар од Лигата на шампионите.
Ова за нив ќе биде втор настап како судиски пар во актуелната сезона во елитното натпреварување. Следниот предизвик ќе го имаат во Швајцарија, каде што ќе ја контролираат играта на дуелот меѓу Криенс и норвешкиот Колстад.
Средбата ќе се одигра на 7 октомври во „Пилатус Арена“ во Луцерн, со почеток од 18:45 часот. За делегат на овој натпревар е одреден Бониферт од Унгарија.
Со новото делегирање, Митревски и Тодоровски продолжуваат со своите европски обврски и уште еднаш добиваат доверба да судат натпревар на највисоко клупско ниво.
