По три одиграни кола во Третата македонска фудбалска лига – Регион 3, две екипи имаат максимален учинок и по девет освоени бодови.
На врвот се наоѓа ланскиот шампион Победа Валандово, кој минатата сезона не успеа да го мине баражот за пласман во Втората лига, но и дебитантот Огражден од Ново Село. Двете екипи имаат по три победи од исто толку натпревари.
Зад лидерите е Малеш од Берово со седум бодови, додека ист број бодови има и Брегалница Делчево, па овие два тима ја делат третата позиција.
На петтото место се Овче Поле и ланскиот второлигаш Каменица Саса со по пет бодови.
Дојранско Езеро има четири бодови и моментално е седмопласирано, додека поранешниот прволигаш и вицешампион Хоризонт Турново е осми со само два освоени бодови од можните девет.
Ударник, пак, има само еден бод по три кола и се наоѓа на деветтата позиција.
На дното има три екипи без освоен бод. Слога Виница, која минатата сезона испадна од Втората лига, е десетта, Карбинци е единаесетти, а Тиверија се наоѓа на последното место.
Токму Тиверија имаше особено тежок почеток на сезоната. Во првото коло на гостувањето кај Овче Поле во Свети Николе претрпе убедлив пораз од 11:0, а потоа на домашен терен беше поразена од Дојранско Езеро со неверојатни 0:13.
Во третото коло Тиверија требаше да гостува кај Малеш во Берово, но не отпатува на натпреварот. Средбата е регистрирана со службена победа од 3:0 за Малеш, кој дополнително ги освои и трите бода.
По три кола, така, на врвот има две екипи со максимален ефект, додека разликите во горниот дел од табелата се мали. Во спротивниот дел, пак, неколку екипи сè уште го бараат првиот бод во новата сезона.
