По седум одиграни кола во Првата женска фудбалска лига, актуелниот шампион Скопје е лидер на табелата со 18 освоени бодови. Тимот од Пржино има учинок од шест победи и еден пораз и се наоѓа на врвот во досегашниот тек од сезоната.
На второто место е Љуботен со 17 бодови. Тетовскиот состав сè уште нема пораз, а по седум натпревари има пет победи и две нерешени средби.
Третото место му припаѓа на Пелистер, кој како новајлија во лигата има освоено 16 бодови. По 13 бодови имаат Тиверија Брера и Каменица Саса, кои ја делат четвртата позиција.
Потоа следува значителна разлика во бодовното салдо. Ас Јунајтед е шести со осум бодови, додека Истатов е седми со шест. На осмото место е Вардар со четири бодови, колку што има и Речица, но поради послабата гол-разлика тимот се наоѓа на деветтото место, односно во бараж зоната за опстанок.
На дното е Кочани со само еден освоен бод. Тимот кој минатата сезона преку бараж обезбеди опстанок и оваа сезона се соочува со тежок предизвик, бидејќи моментално се наоѓа во зоната која води кон директно испаѓање во Втората лига.
Статистиката покажува дека Љуботен е единствениот непоразен тим во првенството, додека Скопје има најмногу победи – шест. Кочани, пак, е единствениот состав без триумф, а со шест порази го има и најголемиот број загубени натпревари.
Кога станува збор за ефикасноста, Тиверија Брера има најдобар напад во лигата. Струмичкиот состав постигна 35 гола на седум натпревари. На спротивната страна, Скопје има убедливо најдобра одбрана, со само четири примени голови.
Најмалку ефикасен напад има Кочани, кој на седумте натпревари постигна само шест гола. Најмногу проблеми во дефанзивата, пак, има Речица, која досега прими дури 36 гола.
