Еурофарм Пелистер го доби битолскиот дуел со својот втор тим, славејќи со 35-24 во последната контролна средба пред почетокот на европските обврски.
Еурофарм Пелистер 2 имаше подобар старт и во првиот дел неколку пати водеше со два, а стигна и до 7-4. Сепак, фаворитот одговори со серија од 4-0 и го презеде водството. До паузата првиот тим замина со 16-12.
Во продолжението Еурофарм Пелистер ја контролираше предноста, а тренерите им дадоа минутажа на речиси сите ракометари. Вицепрвакот на крајот стигна до убедлив триумф од 11 голови.
Калајџиески беше најефикасен кај победникот со шест гола, додека Серафимов постигна пет. Кај вториот тим Митревски реализираше осум, а Ѓоргиевски четири.
За Еурофарм Пелистер ова беше последната проверка пред стартот на Лигата на Европа, каде во првото коло го очекува домашен натпревар против шпанската Ла Риоха.
