РК Прилеп продолжува да го подмладува и засилува својот ростер, а најново име во екипата е 17-годишниот Лав Зековиќ од Црна Гора.
Младиот ракометар настапува на позицијата среден бек и во Прилеп пристигнува со голема мотивација и желба да се докаже. Зековиќ досега го носеше дресот на Партизан Тиват, а за него ова претставува нов чекор во кариерата и прво искуство во македонскиот ракомет.
Станува збор за млад и перспективен ракометар од генерацијата 2009, кој во изминатиот период беше дел и од младинските репрезентативни категории на Црна Гора. Со својот профил тој ќе претставува дополнителна опција за тренерот на Прилеп во организацијата на нападот.
Од прилепскиот клуб потенцираат дека Зековиќ пристигнува со голема желба за напредок и придонес кон тимските успеси, што го прави неговиот ангажман инвестиција не само за актуелната сезона, туку и за иднината на екипата.
Прилеп во досегашниот дел од Суперлигата забележа победи против Куманово и Младост, додека одигра и реми со Тиквеш. Новото засилување доаѓа во период кога тимот има амбиции за уште подобри резултати и место во борбата за највисок пласман.
