Репрезентацијата на Хрватска стигна до убедлива победа над Србија со 28:15 во првиот натпревар од вториот натпреварувачки ден на турнирот „Трофеј Македонија“ во Охрид.
Србија подобро го отвори натпреварот и во првиот дел успеваше да одржува резултатски приклучок. Србинките во еден момент имаа и предност од 6:3, а по израмнувањето на 7:7, двете селекции кратко време играа во ритам „гол за гол“.
Сепак, како што одминуваше првото полувреме, Хрватска ја презеде контролата врз играта. По неколку грешки на српскиот состав, избраничките на Ивица Обрван успеаја да направат разлика и на одмор заминаа со 13:9.
Во второто полувреме хрватската селекција одигра уште поквалитетно. Цврстата одбрана создаваше можности за брзи контранапади, а Србија тешко наоѓаше решение во нападот. Хрватска за кратко време стигна до двоцифрена предност од 21:11, со што практично го реши прашањето околу победникот.
До самиот крај немаше неизвесност. Хрватките продолжија во ист ритам и во вторите 30 минути примија само шест гола, за конечни 28:15.
Најефикасна во победничкиот состав беше Катја Вуковиќ со пет гола, додека кај Србија петпати погоди Александра Васиќ. За најдобра ракометарка на натпреварот беше прогласена Ивана Фратник, која постигна четири погодоци.
Со оваа победа Хрватска испрати јасна порака на турнирот во Охрид, додека Србија по двата натпревари против Македонија и Хрватска останува без победа.
