Алкалоид го дозна својот противник во второто коло од ЕХФ Европскиот куп. На денешната ждрепка во Виена, македонскиот претставник за ривал го доби австрискиот Келаг Ферлах.
Европскиот двомеч ќе започне во Македонија, каде Алкалоид ќе биде домаќин на првата средба на 17 или 18 октомври. Одлуката за патникот во следната фаза ќе биде донесена една недела подоцна, на 24 или 25 октомври, кога македонскиот тим ќе гостува во Австрија.
Алкалоид во оваа сезона влегува како еден од поранешните освојувачи на трофејот. Тимот од Автокоманда стигна до европската круна во сезоната 2024/25, кога во финалето го совлада АЕК Атина. Првиот натпревар во Атина заврши со победа на Алкалоид од 29-25, додека реваншот во Скопје не се одигра, по што ЕХФ ја додели титулата на македонскиот состав.
Тој успех донесе историја и за нашиот најдобар ракометар- Кирил Лазаров, кој со Алкалоид стана првиот македонски тренер со освоена европска клупска титула.
Сега европската приказна продолжува со нов предизвик. Првата пречка за Алкалоид во обидот повторно да стигне далеку во Европскиот куп ќе биде австрискиот Келаг Ферлах.
