Македонската А репрезентација вчера го одржа првиот собир во пресрет на новиот циклус од Лигата на нации. Во рамките на сегментот Б, избраниците ќе одиграат четири натпревари против селекциите на Швајцарија, Словенија и Шкотска.
Првиот натпревар е закажан за 26 септември во Скопје против Швајцарија, по што на 29 септември следува гостувањето кај Словенија. На 3 октомври Македонија повторно ќе биде домаќин, овојпат на Шкотска, додека циклусот ќе биде затворен со гостување кај Швајцарија на 6 октомври во Луцерн.
На првиот собир пристигнаа и фудбалерите кои за првпат добија повик во сениорската репрезентација. Во центарот на вниманието е 19-годишниот Матеј Гаштаров, кој зад себе има одличен период во дресот на Црвена звезда.
Младиот фудбалер успеа да се наметне во првиот тим на белградскиот клуб и да добие значајна минутажа, што му донесе и повик во најдобрата македонска селекција.
За Гаштаров, првиот повик во А репрезентацијата претставува исполнување на детскиот сон. Иако признава дека не очекувал шансата да дојде толку рано, 19-годишниот фудбалер на собирот пристигнува со голема мотивација, амбиција и желба да го оправда укажаното доверие.
„Многу сум среќен, ова го чекав од дете, сонував за ова многу години. Очекувам да настапам и се надевам на позитивни резултати. Секако, одиме на победа без разлика кој е противникот. Имаме голема почит кон Швајцарија, Шкотска и Словенија, но нашиот тим има голем квалитет и одиме на победа. Ќе оставиме срце на терен, како што се очекува од овој дрес“, вели Гаштаров.
Неговиот период во Црвена звезда е исполнет со напорна работа, која му донесе место во стартниот состав.
„Многу работев и давав се од себе за да бидам во првиот состав на Црвена звезда. На крајот тоа дојде. Спремен сум да играм на повеќе позиции, тоа не ми е проблем. Како што ќе бара селекторот, така ќе исполнам се што се очекува од мене. Верувам во тоа што го работам. Дали очекував дека сето ова ќе се случи толку брзо? Можеби не, но секогаш сум спремен за ваков предизвик“, додава младиот репрезентативец.
