Од 20 до 26 септември во италијанскиот град Парма ќе се одржува Европското првенство за тенисери и тенисерки до 16 години, на кое Македонија ќе има четворица претставници.
Во женска конкуренција македонскиот тим ќе го претставуваат Сара Митевска и Лина Николовска, додека кај момчињата ќе настапат Марко Алексовски и Алексеј Стојановски. Истите тенисери ќе ја претставуваат Македонија и во конкуренција на двојки.
Дел од македонските претставници утре ќе ги одиграат и првите мечеви. Алексеј Стојановски во второто коло ќе се соочи со Томи Лукса од Чешка, додека Марко Алексовски за противник ќе го има победникот од дуелот меѓу Јакуб Јашин од Белорусија и Николас Шилц Солви од Луксембург.
Кај девојките, Сара Митевска во второто коло ќе игра против Тинкара Сеп од Словенија, додека Лина Николовска за противничка ја има Андреа Папакирјаку од Кипар.
Македонските тенисери и тенисерки ќе настапат и во конкуренција на двојки. Алексовски и Стојановски во првото коло ќе играат против швајцарската комбинација Колин Ландри и Сем Ван де Лангенберг, додека Митевска и Николовска ќе се соочат со Ајше Бол и Танем Јилмаз од Турција.
Македонскиот тим во Парма е предводен од капитенот и тренер Тања Стојановска.
