Пролет ја доби драмата во Неготино откако со тесни 24:25 славеше над Вардар во рамките на второто коло на Првата ракометна лига.
Натпревар кој понуди вистинска драма, а особено што во самиот финиш домаќинот пропушти два гола предност.
Натпреварот тргна со егал борба и игра гол за гол, каде првата осетна разлика Вардар Неготино ја направи во 19. минута за први плус два 10:8, а потоа и плус три при 11:8 и 12:9. Со одличната игра домашните на полувреме заминаа со 15:11.
Во вториот дел неготинци имаа предност од плус седум при 18:11, а после 45. минута од мечот скопскиот тим започна да ја топи предноста и дојде на 22:21 во 51. минута од средбата.
Самиот финиш беше навистина драматичен кога во 54. минута беше 24:22 за Вардар Неготино, а потоа со Пролет успеа да израмни на 24:24 во 57. минута. На 35 секунди до крајот Пролет искористи тајм-аут, а потоа Ласко Андоновски реализираше гол за победа од 24:25.
Најдобар стрелец кај Вардар Неготино беше Мирослав Митевски, кај Пролет прв стрелец беше Есад Дрпљанин.
Шампион славеше убедлива победа од 38:30 над дебитантот Сокол Саса од Македонска Каменица, во меч каде за домашниот тим Давид Јовчевски и Палев Монев со по осум гола беа најдобри стрелци, додека пак Андреј Лефтеров имаше седум гола.
Кај тимот од Македонска Каменица со 12 гола се истакна Мирче Ѓеоргиев, но недоволно за изненадување и први бодови.
Новајлијата Илинден забележа убедлива победа на домашен терен совладувајќи ја Јехона со резултат од 37:28.
Гостинот од Гостивар на стартот од вториот дел губеше и со шест разлика, но потоа успеа да се врати и во 41. минута да поведе со 20:21. Само пет минути подоцна домаќинот направи плус три при 26:23, а потоа влезе во долга серија на погодоци за конечни 37:28.
Антонио Наковски со десет гола беше прво име кај победничката екипа, кај поразениот гостин Адис Салиу имаше девет гола.
Овче Поле стигна до првата сезонска победа откако на домашен терен со 32:31 славеше над Аеродром во натпревар каде ФИлип Петровски постигна осум гола за домаќинот, а пак Кристијан Стаменков имаше седум реализации.
За тимот од Скопје прво име беше Бојан Божиновски кој погоди девет пати, а го следеше Михаил Митановски со шест гола.
Овче Поле тргна одлично во мечот со разлика од неколку погодоци, за плус пет при 13:8, а на полувреме имаше 18:14. Во вториот дел Аеродром дојде на минус еден, при 19:18, но разликата од пет гола Овче Поле ја врати во 52. минута на 30:25, а на крај славеше со 32:31, откако Аеродром немаше сили за целосно враќање.
Денес Македонија ЃП ќе игра против Текстилец, Партизан ќе ја пречека Преспа, а колото го затвараат Радовиш и Драчево Јуниор во салата „25 мај“ во 18:30 часот.
