Второто коло од Трета лига регион 3 носи неколку интересни средби, каде се очекува голема борба за освојување на бодовите.
Овче Поле кој убедливо ја отвори новата сезона на домашен терен ќе игра против Малеш од Берово. Двете екипи одлично ја отворија новата сезона, тимот од Свети Николе славеше победа со 11 гола, а пак тимот од Берово со четири гола.
Ланскиот второлигаш Каменица Саса утре ќе гостува во Пирава каде ќе оди на мегдан против Пирава, „рударите“ со блага фаворитска предност, а пак домаќините ќе се потпираат на домашниот терен и поддршката од публиката.
Ланскиот второлигаш Слога Виница на домашен терен ќе игра против Победа од Валандово, дуел каде домашните ќе бараат рехабилитација по поразот од Саса, а пак „калинкарите“ по победата во првото коло ќе сакаат нова победа и во Виница.
Карбинци на домашен терен ќе ја предизвикува Брегалница од Делчево за прва сезонска победа, гостинот ќе биде фаворит за цел „плен“, откако со реми против Хоризонт Турново ја отвори новата сезона.
На „Кукуш“ ќе се игра локално дерби меѓу Хоризонт Турново и Огражден од Ново Село. Некогашниот вицешампион на Македонија со реми ја отвори новата сезона со реми во Делчево, а пак дебитантот победнички тргна и ќе сака докажување и на „Кукуш“ против поранешниот прволигаш.
Тиверија по дебаклот во првото коло на домашен терен ќе сака позитивен резултат против Дојранско Езеро, кој исто така загуби со 3:0 во Ново Село.
