Македонскиот мотоциклист Христијан Бузалковски продолжува со одличните настапи во ФИМ Европскиот шампионат, откако изминатиот викенд на легендарната патека „Словакиаринг“ во Словачка освои две места на подиумот во класата СуперСток 1000.
Бузалковски го освои второто место во едната, а третото место во другата трка, со што освои нови важни бодови во генералниот пласман. По настапот во Словачка, македонскиот мотоциклист се наоѓа на третата позиција, со само два бода помалку од второпласираниот натпреварувач.
Токму затоа, последната трка од шампионатот, која ќе се вози во Бугарија, ќе биде директна битка за европската вицешампионска позиција.
По повод одличниот настап, Бузалковски оствари средба со министерот за спорт Борко Ристовски, кој му честиташе за двата подиуми и истакна дека неговите резултати се потврда за потенцијалот на македонскиот мотоспорт.
На средбата било разговарано и за подготовките за завршната трка во Бугарија, каде Бузалковски ќе има можност успешната сезона да ја круниса со освојување на вицешампионската титула во ФИМ Европскиот шампионат.
Министерството за спорт, како што беше истакнато, ќе продолжи да ги поддржува македонските спортисти кои со своите резултати ја претставуваат Македонија на меѓународната спортска сцена.
