Ракометарите на Тиквеш го продолжуваат европскиот пат со двомеч против Handball Esch од Луксембург во првото коло од ЕХФ Европскиот Куп. Кавадарчани ќе имаат предност на домашен терен, бидејќи двата натпревари ќе се одиграат во спортската сала „Јасмин“ на 19 и 20 септември, со почеток од 18:00 часот.
За Тиквеш, ова ќе биде четврта последователна сезона во ЕХФ Купот, а тимот влегува во европскиот предизвик по одличниот старт во домашното првенство. Од друга страна, Handball Esch е искусен европски состав со долгогодишно присуство на меѓународната сцена, а во изминатата сезона во ЕХФ Купот стигна до второто коло.
Пред двомечот, Страхиња Симиќ ја истакна важноста на континуитетот на клубот на европската сцена, но и добрата атмосфера во екипата по успешниот почеток на сезоната. Тој посебно го нагласува потенцијалот на младата екипа и важноста од поддршката од трибините.
„Четврта последователна сезона сме дел од ЕХФ Европскиот Куп, и тоа само по себе, доволно говори за резултатите што ги имаме постигнато во изминатите години. По одличниот старт во домашното првенство, сигурно е дека самодовербата на екипата е на едно добро ниво и така мора да продолжиме и понатаму. Имаме млада и талентирана екипа, која уште на првиот натпревар пред домашната публика покажа голем жар, борбеност и желба. Мислам дека тоа е најубавата покана за сите наши верни навивачи и симпатизери на клубот да дојдат овој викенд во салата „Јасмин“, да ја исполнат до последното место и уште еднаш од Кавадарци да испратиме вистинска и убава ракометна слика. Нè очекува тежок и неизвесен двомеч, но во Кавадарци, во нашата сала и пред нашите браќа – „Лозари“, ние се прашуваме за сè!“- изјави Симиќ.
Тиквеш ќе се обиде домашниот терен и поддршката од кавадаречката публика да ги претвори во дополнителен импулс во пресрет на двата европски натпревари. „Јасмин“ на 19 и 20 септември ќе биде центарот на европските ракометни случувања во Кавадарци, а Симиќ испрати јасна порака до навивачите да бидат дел од новиот европски предизвик на Тиквеш.
