Македонскиот тенисер Калин Митевски е двоен победник на МТП Опен 2026, турнир за тенисери и тенисерки до 12 години од категорија 2, кој деновиве се одржа на терените на ТК „МТП“ во Скопје.
Митевски триумфираше во сингл конкуренција, откако во финалето го совлада Стефан Кустуровиќ од Србија со 2:0 во сетови (6:3, 6:2). До финалето стигна со убедливи победи над Демир Чандемир од Турција во полуфиналето со 6:2, 6:3 и Матс Вајблен од Германија во четвртфиналето со 6:1, 6:1. Претходно, во групната фаза, Митевски ги совлада и Стрибор Поповиќ од Србија и Тибет Акташ од Турција.
Успешен настап имаше и во конкуренција на двојки, каде што Митевски заедно со Кустуровиќ стигнаа до титулата.
Од македонските тенисери, групната фаза успешно ја минаа и Дариан Белчовски, Габриел Никола Петак и Јаков Андреевски, кои обезбедија пласман во четвртфиналето.
Кај девојчињата, титулата во сингл ја освои Романката Јустина Бурада, која триумфираше и во конкуренција на двојки заедно со Лена Раониќ од Црна Гора. Во финалето тие беа подобри од македонската тенисерка Јована Атанасовска и Ева Нистрова од Швајцарија.
Од македонските тенисерки, покрај Атанасовска, групната фаза ја мина и Тициана Апел, но двете беа запрени во четвртфиналето.
