Беласица и Тетекс одиграа нерешено 2:2 во меч од 5. коло на Втората лига, кој се одигра под рефлектори на стадионот „Благој Истатов“ во Струмица.
Гостите од Тетово први стигнаа до предност. Тетекс доби пенал, а Иван Галевски беше сигурен од белата точка за водство од 0:1.
Беласица, сепак, до крајот на првото полувреме направи целосен пресврт. Стефан Сулев го врати резултатот во егал, а Филип Михаилов потоа погоди за 2:1, па струмичани со предност заминаа на пауза.
Тетекс во вториот дел излезе со три измени во состав, една на голманската позиција и заигра поактивно. Подобрата игра на „штофарите“ резултираше со израмнувачки погодок за 2:2.
Во продолжението и двете екипи имаа свои можности за трет гол, но ниту Беласица ниту Тетекс не успеаја да ја искористат некоја од шансите. Така, по интересен натпревар со четири гола, двата тима мораа да се задоволат со по еден бод.
Колото ќе биде комплетирано со одложениот натпревар меѓу Работнички и Брера Струмица.
