Кошаркарскиот клуб ТФТ Скопје продолжува со градењето на ростерот за сезоната 2026/27, а најновото засилување е еден од најперспективните македонски кошаркари – Ѓорѓи Цветковски.
Само на 18 години, Цветковски веќе остави сериозна трага на младинската репрезентативна сцена. На Европското првенство до 18 години постигнуваше просечно 17,3 поени, со одлични 45 проценти реализација за три поени, што му донесе место меѓу најдобрите стрелци на шампионатот и во поширокиот круг кандидати за МВП признанието.
Одлични настапи имаше и во домашното првенство до 18 години. На Ф4 турнирот со екипата на Вибас од Скопје, во полуфиналето постигна 30 поени, додека во финалето против Вардар блесна со неверојатни 39 поени и 11 скока, за индекс на успешност од 41.
Со ангажманот на Цветковски, ТФТ го обединува бековскиот тандем на македонската репрезентација до 18 години, откако во тимот пристигна и Григориј Ѓорѓевиќ.
Овој потег уште еднаш ја потврдува определбата на ТФТ за развој на младите кошаркари, инвестиција во македонскиот талент и создавање тим со перспектива за иднината.
