Градскиот стадион „Гоце Делчев“ во Прилеп добива нов лик и повторно е подготвен да понуди одлични услови за натпревари и тренинг. По периодот на запоставеност и нарушување на состојбата на зелените површини и инфраструктурата, направена е целосна рехабилитација на стадионот.
Како што информираат од ЈКП „Комуналец“ – Прилеп, во соработка со ЈКП „Водовод и канализација“ и Локалната самоуправа, на одредени делови е поставена нова бусен-трева, извршено е целосно третирање со потребните препарати, поставен е систем за наводнување, а тревната површина е рехабилитирана и правилно одржувана со редовно косење.
Од „Комуналец“ посочуваат дека рехабилитацијата на тревната површина на спортските терени е сложен, стручен и долготраен процес. Наместо целосна преработка и пресејување, со посветена работа било постигнато оспособување на постоечката тревна површина.
„Градскиот стадион зелен, чист и подготвен. Јавните претпријатија ЈКП „Комуналец“ – Прилеп, и ЈКП „Водовод и канализација“, во соработка со Локалната самоуправа, извршија целосна рехабилитација на Градскиот стадион. По неговото напуштање и опустошување како на зелените површини, така и на инфраструктурата, извршено е поставување на одредени места на нова бас трева, целосно третирање со потребните препарати, поставување на наводнување, рехабилитација на трева и правилно косење. Фудбалскиот стадион сега е во одлична состојба, зелен, чист и убав и подготвен за спортски натпревари. Инаку, рехабилитација на тревна површина на спортски терени е макотрпна, стручна и трае подолго време како во случајов, кога „Комуналец“, наместо преработка и пресејување, успеа да го оспособи Градскиот стадион“, велат од ЈКП „Комуналец“ – Прилеп.
Денес стадионот „Гоце Делчев“ изгледа зелено, чисто и уредно, создавајќи далеку подобри услови за одигрување на фудбалски натпревари.
Сепак, новиот изглед на стадионот доаѓа во период кога прилепскиот фудбал се соочува со тежок момент. Победа испадна од Втората македонска фудбалска лига и во новата сезона ќе се натпреварува во Трета лига – Регион 5.
Така, Прилеп, кој со години важи за еден од најфудбалските градови во Македонија, во новата сезона нема да има ниту еден второлигаш, а Победа ќе мора преку третолигашката конкуренција да го бара патот назад кон повисоките рангови.
Но, барем фудбалскиот дом е подготвен – Градскиот стадион „Гоце Делчев“ повторно е зелен, уреден и подготвен за нови фудбалски приказни.
