Кошаркарите на МЗТ Скопје вчера го одработија првиот тренинг во пресрет на новата сезона, во која ги очекуваат настапи на три фронта – домашната Суперлига, АБА2-лигата и ФИБА Еврокупот.
Шефот на стручниот штаб Васко Атанасов на располагање го имаше поголемиот дел од составот, а подготовките започнаа во позитивна и работна атмосфера. Амбициите на клубот остануваат високи – борба за сите домашни трофеи, но и успешен настап во регионалното и европското натпреварување.
Посебно внимание ќе привлече настапот во ФИБА Еврокупот, каде МЗТ Скопје ќе се врати по пауза од 25 години.
До крајот на август тимот ќе работи во Скопје, по што следува заминување на тренинг-камп во Гевгелија. Во меѓувреме се планирани и неколку контролни натпревари, кои ќе бидат искористени за воигрување на составот и проверка на формата пред официјалниот старт.
На првиот тренинг беа капитенот Дамјан Стојановски, Војдан Стојановски, Андреј Маслинко, Андреј Андоноски, Лука Стојановски, Никола Василевски, Петар Бошалески, Бојан Величковски, Ноа Фарахан, Лесли Ворнер, Димитрије Николиќ, Емир Крајиниќ и 15-годишниот Давид Петковски.
Првата официјална задача за МЗТ Скопје ќе биде Суперкупот на Македонија, каде кон крајот на септември ќе се соочи со Куманово.
