Вардар со победа го започна натпреварувањето во новоформираната Регионална лига, откако вечерва со 36:30 го доби вицепрвакот Војводина во Охрид.
Тренерот на македонскиот шампион Вардар, Иван Чупиќ, по натпреварот за Спортска Мрежа истакна дека одиграле квалитетен натпревар и заслужено стигнале до победата.
„Мислам дека одигравме коректен натпревар бевме од почетокот до крајот квалитетен противник и ја заслуживме првата победа. Ја изротиравме целата екипа на сите играчи им дадовме шанса, добра регенерација и утре не’ очекува турнирот“, вели тренерот на Вардар, Иван Чупиќ во изјава за Спортска Мрежа.
Чупиќ за Спортска Мрежа зборуваше и за новата сезона, за екипата, подготовките, плановите, целите и амбициите.
„Кога сте во Вардар очекувањата се најголеми што може да бидат, за тоа и не треба да се зборува, Вардар секогаш оди по трофеи, Вардар секогаш сака да освојува и лигата, Купот и Суперкупот, добро да се претстави во Европа и Лига на шампиони и Лига Европа. Имаме некои промени во составот мислам дека составот е одлично избалансиран, мислам дека екипата ја подготвивме навремено. Посакувам само играчите да бидат здрави и одиме чекор по чекор, а Вардар секогаш мора да оди на победа, тоа е менталитет на клубот, мораа сите и старите и новите играчи да се навикнат дека тоа е така во Вардар, бидејќи дресот на Вардар е тежок, голема одговорност, затоа и сме тука и нема зошто да се плашиме, но треба да сме мирни и со двете нозе на земја, чекор по чекор, натпревар по натпревар и ќе видиме до каде ќе стигнеме“, изјави Чупиќ во ексклузивна изјава за Спортска Мрежа.
Вардар од утре го очекуваат предизвиците на петтото издание на меморијалниот турнир „Крсте Андоновски“ во Охрид.
