Актуелниот шампион Вардар нема старт каков што посакуваше во Првата македонска фудбалска лига, откако го запиша вториот пораз во низа во рамки на третото коло, губејќи од Струга Трим Лум со минимални 1:0.
Стружани стигнаа до втората сезонска победа благодарение на голот на Христијан Малески кој погоди во 61. минута од средбата, по чистите мрежи во првиот дел.
Во судиското надополнува главниот судија Доне Ристовски покажа на белата точка за Вардар, но Давид Бабунски биеше високо над голот и со тоа пропушти можност скопскиот тим да освои барем бод, а по мечот Бабунски остана со рацете на глава.
Иако Вардар статистички беше подобар на теренот, сепак бодовите остануваа во Струга, а шампионот дома се враќа со празни раце откако во претходното коло го загуби и дербито до конкурентот за титулата, Шкендија со 2:0.
64 проценти беше поседот на топката кај Вардар наспротив 36 проценти кај стружани, а кога се во прашања ударите кон голот, тогаш истите се шест – шест, а вкупниот број на шутеви е 9 наспротив 13 за Вардар.
Претходно, Вардар остана без аргентинскиот тренер Кристијан Фабијани, а денес „црвено-црните“ ги предводеше Матија Мирков, впишувајќи пораз.
Во следното коло Струга Трим Лум ќе игра дерби против Шкендија во гости, а пак Вардар ќе бара рехабилитација и враќање на победите против Силекс на домашен терен.
По три кола Струга има седум бода, а пак Вардар останува со три бода, од дуелот против Брегалница (2:0) од првото коло.
