Актуелниот шампион Вардар ќе има можност за брза реакција по неуспешната измината недела, но пред себе има исклучително тежок предизвик – гостување кај Струга Трим Лум во рамките на третото коло од Првата македонска фудбалска лига.
„Црвено-црните“ минатиот викенд го загубија дербито со Шкендија на Арената „Тодор Проески“, а поразот беше последен во низата лоши резултати на домашен терен, имајќи ги предвид и неуспесите во европските натпревари. Сето тоа резултираше со прекин на соработката со аргентинскиот стратег Кристијан Фабијани.
На клупата на Вардар во Струга ќе биде Матија Мирков, досегашниот прв асистент на Фабијани. Мирков добро ја познава екипата, а во стручниот штаб беше и минатата сезона, кога Вардар под водство на Гоце Седлоски ја освои шампионската титула.
Новата тренерска ситуација носи и одредена неизвесност околу стартниот состав. Мирков ќе има задача да го избере најдоброто решение и да најде комбинација која ќе одговори на барањата на натпреварот и ќе му овозможи на Вардар да се врати на победничкиот пат.
Една од работите што може да му даде оптимизам на шампионот е неговиот учинок на гостински терен. Вардар сезонава покажа дека надвор од Скопје може да изгледа значително подобро, особено во европските натпревари, каде што успеваше да доаѓа до позитивни резултати. Спротивно на тоа, настапите на Арената „Тодор Проески“ не беа на посакуваното ниво.
Сега останува да се види дали тренерската промена ќе донесе позитивен импулс и дали Мирков уште на својот прв натпревар како шеф на стручниот штаб ќе успее да го предводи Вардар до важни три бода.
Од другата страна, Струга Трим Лум го пречекува шампионот со свои амбиции и со желба пред домашната публика да стигне до нов позитивен резултат. Стружани сигурно ќе сакаат да ја искористат турбулентната ситуација во редовите на Вардар и да го искористат домашниот терен како своја предност.
Натпреварот Струга Трим Лум – Вардар се игра денеска од 16:30 часот, а главен судија ќе биде Доне Ристовски.
