Струга Трим Лум во дерби натпреварот од третото коло во Првата македонска фудбалска лига денеска од 16.30 часот ќе го пречека актуелниот шампион Вардар.
Стружани најавуваат дека се подготвени за надигрување, а напаѓачот Христијан Малески верува дека неговиот тим може да стигне до победа.
„Се надевам дека ќе биде квалитетен и интересен натпревар, вистинско дерби во кое сакаме да го покажеме најдоброто од себе и на крајот бодовите да останат во Струга. Цела недела се подготвувавме за овој натпревар и добро го анализиравме противникот, па во дуелот ќе влеземе максимално подготвени. Верувам дека целиот тим ќе го даде максимумот и дека пред нашите навивачи ќе стигнеме до нови три бода во сезоната“, изјави Малески.
Напаѓачот воедно беше стрелец на последниот гол за Струга Трим Лум во дуелите против Вардар минатата сезона.
„Можам да кажам дека ќе го дадам максимумот против Вардар. Доколку успеам да постигнам гол, без сомнение тоа ќе биде награда за она што ќе го покажам на теренот“, дополни еден од адутите на Струга Трим Лум.
Дербито ќе се одигра денеска, со почеток во 16.30 часот на Градскиот стадион во Струга, а ќе го суди Доне Ристовски.
