Во тек е завршната фаза на реконструкцијата на СРЦ „25 Мај“ во Радовиш, каде веќе се поставува новиот под, а во наредните денови ќе бидат поставени и новите столчиња на двете трибини.
Директорката Лолита Арсова која гостуваше во Спортска Мрежа, истакна дека претходниот под бил направен од пластика и бетон, а сега се поставува модерен под кој ќе ги задоволува сите ЕХФ стандарди. Новите столчиња ќе бидат фиксни, а салата ќе може да прими до 2.000 гледачи.
Со оваа реконструкција, салата која е изградена во поранешна Југославија ќе добие нов, современ изглед и ќе биде значително подобрена во однос на условите, со што ќе се осигурат подобри услови за спортување и за гледачите.
Целокупниот проект за реконструкција на спортската сала е вреден околу 20 милиони денари, средства кои ги обезбеди Министерството за спорт. Покрај тоа, Општина Радовиш ќе направи дополнителни вложувања за уште подобри услови во самата сала.
Реконструкцијата на спортската сала се очекува да заврши до крајот на следната недела, по што објектот ќе биде повторно пуштен во употреба.
Спортската сала во Радовиш, која е отворена во 1986 година, има вкупна површина од 3.968 м2, а комплексот располага со голема сала од 1.126 м2 и мала сала од 400 м2.
