Една од најталентираните голманки во македонската женска Супер лига, Симона Грујовска, реши да стави крај на својата активна ракометна кариера, објави Спортска Димензија.
Грујовска во досегашниот тек на кариерата се наметна како квалитетна голманка, која честопати беше меѓу најдобрите поединци на својата екипа, а не беа ретки натпреварите на кои имаше и двоцифрен број интервенции.
Нејзиниот последен клуб беше Куманово, каде што настапуваше и во вториот дел од минатата сезона. Токму во тој период се здоби со повреда по која следуваше пауза од терените. Во меѓувреме, Грујовска донесе одлука да го прекине активното играње ракомет, иако со својот квалитет и потенцијал сигурно би била посакувано засилување за голем број суперлигашки екипи.
Ракометниот пат го започна во школата на Вардар, а во дресот на „црвено-црните“ го оствари и еден од најзначајните успеси во кариерата.
Во 2019 година, на завршниот Ф4 турнир од Купот на Македонија, кој се одржа токму во Куманово, Грујовска беше прогласена за најдобар голман на турнирот, додека со Вардар го освои сребрениот медал.
Во кариерата двапати го носеше дресот на Куманово, а во сезоната 2022/23 со кумановскиот тим стигна до трофејот во Купот на Македонија. Беше дел и од Металург Автокоманда, клуб кој повеќе не постои.
Грујовска имаше и репрезентативно искуство. Таа ги бранеше боите на кадетската и младинската репрезентација на Македонија на ЕХФ шампионатите, а беше и дел од поширокиот список на сениорската репрезентација.
Иако сè уште е млада и пред неа можеше да има уште многу успешни сезони, Грујовска одлучи да стави точка на активното играње и да се насочи кон професионален план надвор од теренот.
Зад себе остава кариера исполнета со настапи во македонската Супер лига, трофеј во Купот на Македонија, индивидуално признание за најдобар голман на завршен турнир и репрезентативни настапи во младинските категории.
