Пелистер продолжува да го гради составот со кој ќе атакува на највисоките позиции во Втората македонска фудбалска лига, а едно од новите имиња во битолскиот тим е Кире Стојанов.
20-годишниот фудбалер пристигна од Брера Струмица и игра на позицијата лево крило.
Младиот фудбалер со голем мотив го очекува новиот предизвик во дресот на Пелистер, а во својата порака до навивачите истакна дека заедничката цел е експресно враќање во елитата.
„Возбуден сум за новиот предизвик, заедничките цели и сè што не очекува во периодот што следи. Ќе дадам максимум на секој тренинг и секој натпревар, со желба заедно да постигнеме големи работи. Пелистер е клуб со традиција. Со поддршка од Чкембарите до целта и враќање во Прва лига.“
Пелистер во новата сезона влегува со високи амбиции и јасна цел – борба за врвот и враќање во Првата македонска фудбалска лига.
Првата можност за тимот да покаже што подготвил доаѓа веќе овој викенд. Пелистер новата сезона ја отвора в недела од 20:00 часот на домашен терен, против Камјани, во натпревар од првото коло.
