Македонскиот прволигаш Тиквеш не запира со засилувањата во пресрет на продолжението од сезоната, а најново име во редовите на кавадаречкиот клуб е бразилскиот фудбалер Жоао Габриел Фереира Сантос – Ренатињо.
Станува збор за млад фудбалер кој настапува на позицијата десен бек и од кого во Тиквеш очекуваат да внесе дополнителен квалитет, енергија и конкуренција во составот. Кавадарчани веруваат дека неговите технички способности и желбата за докажување ќе бидат значаен адут во новата сезона.
„Со големо задоволство го претставуваме нашето најново засилување, Жоао Габриел Фереира Сантос – „Ренатињо“. Млад, технички квалитетен и гладен за успех, тој доаѓа во Кавадарци за да биде дел од новото поглавје на ГФК Тиквеш. Веруваме дека со својата енергија, талент и посветеност ќе придонесе за успесите што ги градиме заедно“, велат од кавадаречкиот прволигаш.
Тиквеш на одличен начин ја отвори новата сезона во Првата македонска фудбалска лига, откако на домашен терен убедливо го совлада Арсими со 5-1, испраќајќи јасна порака дека и оваа сезона ќе има високи амбиции.
Со ангажманот на Ренатињо, кавадаречкиот клуб продолжува да го комплетира играчкиот кадар, а во клубот очекуваат новиот бразилски интернационалец што побрзо да се вклопи во екипата и да даде свој придонес во остварувањето на зацртаните цели.
