Новиот прволигаш ФК Скопје ја отвора сезоната со гостински натпревар против вицепрвакот Шкендија. Мечот ќе се одигра на комплексот на Фудбалската федерација на Македонија со почеток во 19 часот, а новиот шеф на стручниот штаб на клубот од Автокоманда, Муарем Муарем, верува дека неговиот тим може да му парира на фаворитот.
„Нема сомнение дека Шкендија фаворит по неколку основи, и квалитативно, но и се наоѓа веќе во натпреварувачка форма, со оглед дека настапува во европските купови. Ние подоцна ги стартувавме подготовките, сѐ уште сме и во фаза на изградба на тимот, но ќе се обидеме максимално да му отежнеме на противникот на овој натпревар. Мотивите кај мене и кај фудбалерите се огромни, веруваме дека можеме да одиграме добар натпревар и на крајот да оствариме позитивен резултат“, вели новиот тренер на ФК Скопје.
Натпреварот Шкендија – Скопје ќе се одигра на комплексот на ФФМ и ќе го заокружи првото коло во новата сезона од Првата фудбалска лига.
