Македонскиот вицешампион Еурофарм Пелистер и официјално ги започна подготовките за новата натпреварувачка сезона. Со првиот работен состанок и прозивката на ракометарите, битолскиот тим означи почеток на новото поглавје, кое ќе биде предводено од искусниот хрватски стратег Лино Червар.
Червар, на првата средба им се обрати на ракометарите, го претстави планот за подготовките и ги мотивираше своите избраници, посакувајќи им пред сѐ добро здравје и успешна сезона исполнета со резултати.
Пред стартот на интензивниот тренажен процес, екипата денес ќе има заедничка вечера, а во следните два дена ќе ги реализира задолжителните медицински прегледи и тестирања.
Во новата сезона Еурофарм Пелистер ќе изгледа значително поинаку. Нови имиња во ростерот се Алекса Колаковиќ, Мартин Серафимов, Миха Котар, Омер Мехмедовиќ, Едвин Џелетовиќ, Малик Татар, Ненад Белистојаноски и Диего Басанесе, кои ќе треба да донесат дополнителен квалитет и свежина во тимот.
Од друга страна, клубот се раздели со Усама Хосни, Богдан Радивојевиќ, Илија Абутовиќ, Домен Тајник и Дејан Манасков, па стручниот штаб ќе работи на што побрза адаптација на новите ракометари.
Според програмата, пелистерци првата недела од подготовките ќе ја одработат во Битола, по што ќе се преселат во Словенија, каде ќе ја реализираат базичната фаза и ќе ги постават темелите за предизвиците што ги очекуваат во сезоната 2026/27, во домашните натпреварувања и на европската сцена.
