ГРК Охрид, денес и официјално ги стартуваше подготовките за новата натпреварувачка сезона, а тренерот Борис Ројевиќ ја изврши првата прозивка со играчкиот кадар. По заминувањето на хрватскиот голман Кристијан Пилиповиќ, охридскиот клуб, на голманската позиција го ангажираше неговиот сонародник и хрватски репрезентативец Дино Славиќ.
Заедно со Даниел Ѓорѓески и Бојан Блажески, Охрид и во новата сезона ќе располага со квалитетно голманско трио, кое ќе има задача да го задржи високото ниво меѓу стативите, по историската сезона во која клубот го освои трофејот во ЕХФ Европскиот куп.
Во своето прво обраќање за Спортска Мрежа, Славиќ истакна дека е воодушевен од првите впечатоци од Охрид, од приемот што го добил во клубот и градот, а не ги крие ниту амбициите – да се нападнат трофеи во домашните натпреварувања и да се повтори европскиот успех од минатата сезона.
„Ова ми е прв тренинг со новите соиграчи. Некои од момците ги знаев од претходно, некои ги запознав денес. Мислам дека како за прв тренинг беше навистина квалитетен, имавме тестирања, не знам какви се резултатите. За првпат во мојот живот сум во Охрид, пред два дена дојдов. Навистина сум задоволен од градот, луѓето… навистина врвно ме пречекаа.”
Хрватскиот репрезентативец не ги крие високите амбиции пред почетокот на сезоната. Славиќ очекува Охрид да биде конкурентен на сите фронтови, со борба за домашните трофеи, но и со желба да го повтори европскиот успех од минатата сезона, кога клубот го освои ЕХФ Европскиот куп.
,, Што се однесува на моите очекувања од новата сезона, секако очекувам дека ќе се бориме за трофеи – во Купот, Суперлигата. Се надевам дека ќе го повториме успехот на момците од минатата сезона во ЕХФ Купот и навистина посакувам да освоиме барем еден трофеј во новата сезона.“- вели Славиќ за Спортска Мрежа.
Охриѓани зад себе имаат историска сезона, крунисана со европски трофеј, а во новиот шампионат амбициите остануваат подеднакво високи. Тимот на Борис Ројевиќ ќе се обиде да ја одбрани титулата во ЕХФ Европскиот куп, паралелно водејќи битка за домашните трофеи и продолжувајќи ја убавата ракометна бајка што изминатата сезона ја испиша во градот покрај Езерото.
